ZERREYÊ WESAYİT RA KEYFÊ SİNEMA

Belediyaya Çoligi, 2 rueji teber dı fealiyetê wesayit ra filma sinema seyrkerdış tertib kerd. Hemwelatiyon verê ekranê pili dı keyf kerd.

Hemwelatiyi ki riyê virusê korona ra mudeyo derg ra nat nêeşkeni şiyeri sinema, fealiyetê wesayit ra film seyrkerdış ê Belediyaya Çoligi dı keyf kerd.

Fealiyeto ki qerajê qezayon dı tertib bı tede ruejo verin filma ‘Mucizeya Koğuşa Hotın’ ruejê dıyın dı zi filma ‘Rafadan Tayfa Göbekli Tepe’ ome ramuetış.

Hemwelatiyon maskeyi nayi xu fek ra u ekranê sinema ver dı ameyi piser. Organizasyon dı nostaljiya teber bı film seyrkerdış zi bibi. Reisê Belediya Erdal Arıkan u ekibon lazuto teqnayi u ğazoz da hemwelatiyon.

Çoligıjon qıc ra pil verê ekranê pili dı filma ‘‘Mucizeya Koğuşa Hotın’ u filma ‘Rafadan Tayfa Göbekli Tepe’ pê keyf seyr kerdi.

 “Çolig dı dora verin tertib bi”

Reisê Belediya Erdal Arıkan dora verin wesayit ra film seyrkerdış ser vındert u va; “Hemwelatiyonê ma ın fealiyet zaf waştên. Ma zi cewab da ın waştışê yin, ma bınate dı mesafe verda u ma fealiyetê ‘Wesayit ra Film’ tertib kerd. Filmonê  ‘Mucizeya Koğuşa Hotın’ u ‘Rafadan Tayfa Göbekli Tepe’ zaf alaqa di. Ê sehneyi ki ma filmonê Yeşilçam dı dini ma tiya zê eyni sehneyon film seyrkerd. Ma lazuto teqayi u ğazoz da hemwelatiyon. Hemwelatiyonê ma xu maske kerd u bınateyê xu dı mesafe verda. Ma pê ınay zi zaf biyi şa. Homa biyaro weri ma mudeyê pandemi dı çarçiwaya qeydeyon dı semedê hemwelatiyonê xu fealiyeton tertib keni. Ez hemwelatiyonê ma ri u ombazonê xu ri zaf teşekur keno.”

Hemwelatiyon zi Reisê Belediya Erdal Arıkan ri teşekur kerd

Hemwelati Ehmed Dengeşik o ki pa keyeyê xu film seyr kerd hına va; “Şarê ma riyê pandemi ra kot tengasi; saloni sinema mudeyo derg ra nat qefılnayeyi. Şarê ma pê ın fealiyeto nazık u rınd ê belediyaya ma hesretê sinema xu zerr ra vet. Ma yin ri zaf teşekur keni, hesretê sinema ê şarê ma viyarna.”

Sema Çiftçi ya ki filmon u fealiyet ra zaf bi memnun zi hına qısey kerd; “Ma omeyi fealiyetê Belediyaya ma. Ma zaf biyi memnun. Çolig dı dora verina xebatêka hınayin bena. Homa tera  razi bo Reisê ma ome, iştıraq kerd, bı alaqadar.”

Hemwelatiyon ra Şahap Demir zi hına va; “Semedê Çoligi fealiyetêko zaf rınd bı. Heto bin ra lazut u ğazoz dayi ma. Ez pa xonıma xu omeyo. Ma zaf memnun biyi. Keda komi esta ma hemın ri teşekur keni.”

Anket

Yeni sitemizi beğendiniz mi ?

Evet
Hayır
Normal