YEMÊ TESİSÊ ENTEGRE VIRAZİYA

Hetê Reistiya Yoyiya İdarekaronê Mehali u Xızmetê Doruveri ê Belediyaya Çoligi ra projeya ‘Çuep ra ceyron hesılkerdışi’ dı yemê tesisê entegre vıraziya. Heta peyniyê emserr tesis vıraziyeno u gazê metan ra ceyron hesıl beno.  

Belediyaya Çoligi yo merasim tertib kerd u xebata cayê depoyê eşteyê wışki dı gazê çuep ra enerji hesıl kerdış da destpêkerdış u yemê tesisê entegreyi, şuxılnayişê saha, cêmiyon dı vicnayiş, tesisê çuep ra enerji hesıl kerdış u tesisê fermantasyon vıraşt.

Waliyê Çoligi Ali Mantı, Reisê Belediyaya Çoligi Yücel Barakazi, Reisê Belediyaya Bongılon Abdulhakim Yıldız, Reisê Belediyaya Qarliova Veysi Bingöl, Reisê Belediyaya Arakonak Mustafa Döner, Mudirê Emniyetê Bajari Metin Akay, Qumandanê Jandarma ê Bajari Albay Mevlüt Dirim u amiri teşkilaton iştıraqê merasim kerd.

Merasimê vıraştışê yemê tesisê entegre pê duayon vıraziya. Waliyê Çoligi Ali Mantı derheqê proje dı Reis Barakazi ra malumat guret u va, Huma bıkero wesileyê xeyron.

Barakazi ita dı qazetewonon dır qıseyi kerd u va, bad qêdinayışê tesis a gazê metani ki çuep ra vêciyeno ê gazi ra enerjiyê ceyron hesıl beno.

Yatırım 35 milyon tepışt

Barakazi, una dewom kerd,  “Projeya ki maliyetê yê 35 Milyon tepışto, aya proje dı cayê çuep pê herr ra lewê yê qêfıliyawo. Firmaya ki ma ihaleyê eşteyê wışkı tedı vıraşta aya firma dest pê xebat kerd u sistemê bınê çuep ra gaz guretış, qanalê drenaji (awkê çuepi nasılnayış) u cayê stoqê wel biyo temom. Etabê 2yın ê projeya ma zi eyru vıraziya u ma yemê tesisê xu eşto. Yo het ra vıraştışê tesisê entegre dewom keno heto bin ra zi qê hesılkerdışê ceyron zobina xebati beni temom.

Barakazi, qalkerdışê xu una qêdina, “Bad qêdinayışê proje ya, tesisê eşteyê wuşki ki ruec dı 140 henzar ton çuep yeno pêser, ını çuep ra enerjiyê ceyron hesıl beno. Inka teyna çuepê Çoligi nê bajar u qezayonê doruverê Çoligi ra zi çuep ita dı yeno pêser. Hedefê ma hina zaf çuep pêserardış u hina zaf enerji hesılkerdış o. Bad vıraştışê tesis u Wezaret dı gureyê safikerdışê lisansi ra xebata enerji hesıl kerdış dest kena pê. Etaba vêrin dı 1 megawatt enerji hesıl beno u xeta ki mıntıqa ra viyerena bena aya xet ser. Ma pê ini yatırımonê duestê doruveri ya hem doruverê xu pak tepışeni hem zi iqtısadê belediya ziyedneni. Wa projeyê ma Bajar u Dewletê ma ri wesileyê xeyron bu.”

Anket

Yeni sitemizi beğendiniz mi ?

Evet
Hayır
Normal