REİS ARIKAN QISEYO PEYIN VA

Reis Arıkan cewab da eşkeraya Barakazi u va; “Guerê qeydê muhasebe u reqemon deynê belediyaya ma 142 milyon u 219 hezar u 729 lira yo. Qıseyi ki pê texmin u hesabo ğelet omeyi vatış raşt niyi.”

Reisê Belediyaya Çoligi Erdal Arıkan derheqê deynê belediya dı cewab da qıseyonê Reisê Verinê Belediya Yücel Barakazi.

Arıkan va pê beyanat ze ku “14 milyon lira komi deyn kerdo?” yo famo ğelet vıraziyayo u hına qısey kerd; “Ma çarçiwaya belediyaya şefaf u hesab dıyayi deyno ki guruto xuser kerdo eşkera. Wext ma wezife dewır guret guerê qeydon 142 milyon u 219 hezar u 729 lira deynê belediya bıbı. Eşkeraya ma ra pey Reisê Verinê Belediyaya ma yo beyanato bêşans dawo; reqemo ki ma kerdo eşkera inkar kerdo; 9 milyon lira faizê qrediyê Banqaya İller xu guerı esterıto u hesabêko ki raşt niyo eşto meydon. Halbuki Banqaya İller derheqê esterıtışê faizê qredi dı yo muamele nikerdo. In weziyet dı ın deyn hesab nikerdış ya zi esterıtışê ma mewzu behs nibeno. Heto bin ra iddia biyo ki ma 4 milyon u 360 hezar lira deyn kerdo. Ma zerreyê 2 aşman dı qet bı şeklêk zi deyndar nibiyi u ınay ser yo teşebusê ma zi çin o. Dest bı wezifekerdışê ma ra nat ma qet taba deyn nikerdo heto bin ra zi ferqê 4 milyon u 360 hezar lirayo ki iddia beno zi raşt niyo. Reqemi ki ma vati reqemi neweyi ê muhasebe yi. Derheqê mewzu dı heme melumati u wesiqayi hê qeydê muhasebeya ma dı yê. Ma derheqê deynon dı çıkes sucdar nikerd, teyna ma waşt derheqê weziyet dı melumat bıdı şarê xu. Niyeta ma çıkesi dır cedel niyo teyna melumat dayiş o. Ma pê hayidari ki belediyayi ha pê waridatê xu ha zi pê qrediyo ki ciya ciya fonon ra geni xızmet keni. Elbet beno ki semedê bajarê xu ri xızmet ma zi deyn bıker. Wext waridat tayn bo heme belediyayi eşkeni deyndarê yo deynê raşt u maqul bi. Semedê şarê xu ri xızmet eyro ra pey zi eger icab bıkero ma bı kontrol u maquli deyn keni.”

“Taktik nê, zelali”

Reis Arıkan hına dewom kerd; “Vateyê ercani ê taktik semedê zırar mı u teşkilatê ma dayiş o. Mı çarçiwaya qeydeyê belediyaya zelal dı u bı nomeyê Reisê Belediya weziyeto mali ê Belediyaya ma kerd eşkera. In weziyet dı tesir u waştışê qet yo partiya siyasi çin o. Ma wext tabloyo mali ê xu hesab kerd ma qet ihtiyaci bı mutehasısê hesab nidi u ma nivineni zi. Qey ınay zi lazım niyo merdım mutehasısê hesab bo. Çunki muhasebeya ma dı personeli ma yi ki bıeşki ın hesab bıkeri esti.”

Reis Arıkan va “ez niwazeno çıkesi dır cedel bıkeri u mewzuyonê hınayinon ser qısey bıkeri”  vateyê xu hına qedina; “Ma çıkes nikerd hedef, ma çıkes nikerd sucdar; ma teyna çarçiwaya qeydeyê zelali dı u pê yo niyeta xalis deynê belediyaya xu kerd eşkera. Ma wazeni heme wextê xu u quwetê xu semedê bajarê xu u waadi ki ma prosesê vicinayiş dı dayi semedê yin caardış xerc bıker. Mesuliyeto ki şarê ma dawo ma, ma pê hayidari; ma qet yo çik viyonı nikeni u semedê heme projeyonê xu tetbiq kerdış cehıd keni.”

Anket

Yeni sitemizi beğendiniz mi ?

Evet
Hayır
Normal