PROTOKOLÊ DEWIR İMZA BI

Cayê İdareyê Xısusi ê Bajar, pê protokol imzakerdışê Vali Mantı u Reis Barakazi dewırê Belediya bı. Barakazi va: “Ma mudeyêko kılm dı projeyê cayê idareyê xısusi u bereqayonê peyê cı vırazeni u dest bı vıraştışê cayê zerguni u otopark keni. Cayo ki 40 serr ra çıkesi nibedılna, projeyê cı vıraştış bı qısmetê ma.”

Derheqê cayê binaya Xızmetê İdareyê Xısusi u lojmanonê cı verco fıkırê ruetışi veciya bı; labelê dıma qerarê ıno ca dewırê Belediya kerdış dıya bı. Semedê ıno ca Walitiya Çolig dı kombiyayiş tertib bı.

Waliyê Çoligi Ali Mantı, Reisê Belediyaya Çolig Yücel Barakazi, Reisê Meclisê Bajar Yaşar Demir, Mıftiyê Çolig Muharrem Genç u bereqayi ki peyê lojmanonê idareyê xısusi dê, wayironê bereqayon iştıraqê kombiyayiş kerd. Kombiyayiş dı protokole dewır imza bı.

Wali Mantı: “Ma semedê menfeetê Çolig dewırê belediya keni”

Wali Mantı imzabiyayişê protokol ra pey va, ma qıymetê 40 milyon lira dı ca, semedê menfeetê Çoligi dewırê belediya kerd.

Wali Mantı hına qıseykerd: “Ma cayê idereyê xısusi semedê vıraziyayişê parq u cayê zerguni dewırê belediya keni. Bı cayê idereyê xısusi ya, tor bereqayonê peyê cı u herında qonaxê hukumati otoparq u cayê zerguni vıraziyeni. Wa ına proje qey Çolig bı xeyr bu. Sarı dı Reis Yücel Barakazi, keda komi ına proje dı esta ez hemın ri teşekur keno. Ma semedê hemwelatiyon ri xızmet, cayê xu yo ki qıymetê cı 40 milyon lira wo, bêpere dewırê belediya keni. Hemwelatiyi ma yi ki bereqayon dê yin zi imzayi xu eşti u muameleyê dewır temom bı. Ez wayironê heq ri zi semedê xesasiyetê yin teşekur keno.”

Barakazi: “Beno cayo zergun u otoparq”

Reis Barakazi zi derheqê mewzu dı va, ıno dewır semedê rehetiya trafiki u cayo zergun zaf muhim o. Pê wayironê bereqayon dı imza biyayişê muwafaqatname ca hina bı hira.

Reis Barakazi hına qısey kerd: “Bereqayi peyê idareyê xısusi erdlerzê 1971 dı semedê şantiyeya afat vıraziyayi, dıma zi hetê hemwelatiyon ra omê şıxulnayiş. Mulkiyetê ıni cayon serronê 1970 dı semedê vıraziyayişê park dewırê Belediya biyo. 40 serr ra nat derheqê ıno cayi dı hetê belediya ra qet yo proje nivıraziyo. Hezar şıkır, bı xesasiyetê wayironê heq ına mesela bi safi. Ma waliyê ma, wekilonê ma u azayonê meclisê bajar dır istişare kerd, ma ruetışê cayê idareyê xısusi iptal kerd u dewırê belediyaya ma bı. Ma cayê bereqayon zi keni ser u piser dı 6 hezar u 100 qaremetre ser projeyê cayê zerguni u otopark erzeni fealiyet. Ma cayê qonaxê hukumat dı zi meydanê bajar u otopark vırazeni. Wext projeyê ma temom bıbi, hem merkezê çarşu beno zergun hem zi meselaya trafik bena safi. Ma pê projeyê Beşyol zi meselaya otoparkê ê cayi keni safi u trafik dı meselayêka pil hal keni.”

“Ez wayironê ked ri teşekur keno”

Barakazi hına dewom kerd: “Heta ına merhale keda Waliyê ma Ali Mantı zaf a. Ez huzurê şıma dı cı ri teşekur keno. Reyna semedê temombiyayişê muameleyon u protokol Paştmirê Reisê AK Parti Cevdet Yılmaz ri, wekilê ma Feyzi Berdibek ri, Reisê Meclisê Bajar Yaşar Demir, azayonê meclis u heme kedkaron ri teşekur keno. Sobina wayiri heqi ki pê muwafaqatname imzakerdış paşt da projeyê ma, ez yin ri zi zaf teşekur keno. Yo mude dıya wayironê heq. Ino mude dı hem perê yın dıyeno hem zi bereqayi yeni vengkerdış. Proje zi mudeyêko tor kılm dı viyereno heyat.”

Anket

Yeni sitemizi beğendiniz mi ?

Evet
Hayır
Normal