İHALEYÊ PROJEYÊ AFATON VIRAZİYENO

 

Reis Arıkan derheqê wedê xu yê tor muhim ê vicinayiş dı mijdon da u va; ihaleyê newekerdışê bajari vıraziyeno. 

 

Reis Arıkan, derheqê meselayonê tor muhimon ê bajari ra meselaya bajari newekerdış dı va; “Ma şew u ruej xebıtiyayi, ma her het ra gıroni na ına mesela ser u Homayi ri şıkır ma resayi netice. 2 Tışrino Verin dı ma ihale vırazeni. Wa semedê bajarê ma bıxeyr bo, bımbarek bo.”

 

Reisê Belediyaya Çoligi Erdal Arıkan, derheqê weziyetê peyini ê meselaya bajar newekerdış ê Mehlaya Afaton dı melumat u mijdon da.

 

Reis Arıkan va; “15.1 hektar cayi ser serra 2013 dı qerarê bajari newekerdışi diya, 2016 dı zi 856 cayo ki ayidê 923 wayironê heqi bı şoniya we. Ina meselaya bajari ya ki hıni bibi zê yo niweşi ma kerd safi u resna goma ihale.”

 

2 Tışrino verin dı ihale beno

 

Projeyo ki bajari resneno yo vizyono newe, Reis Arıkan derheqê cı dı hına qısey kerd; “Hetê TOKİ ra 2 Tışrino Verin 2020 ruej Cuma ihale vıraziyeno. Semedê Mehlaya Afaton dı inşaatê 1172 keyeyi, 196 dıkoni, xebata bınvırazi u dormaleyê cı, çarçiwaya Qanunê İhale ê Kamu dı pê usulê ihaleyo eşkera, ihale vıraziyeno.”

 

Arıkan hına va; “ hale ra pey muqawele imza bena u ınay ra dıma zerreyê 10 ruejon dı ca teslim beno u dest bı gurı beno. Homa biyaro weri proje zerreyê 600 ruej dı temom beno. Çarçiwaya proje dı yo 123 qaremetre u yo zi 150 qaremetre ser 2 tipi boni moderni yeni vıraştış.”

 

"Beno projeyêko emsal"

 

Reis Arıkan, guerê estetikê bajari vıraziyayişê proje ser vındert u hına va; “Ruejo ze ma dest bı wezife kerd o ruej ra heta eyro ma semedê meselayonê wayironê heqi safikerdış u bajarê ma newekerdış zaf xebıtiyayi. Ma şew u ruej ın proje ser xebıtiyayi. Şıkır Homayi ri, ma eyro resayi neticeyê ın cehd u ğeyreti. Ma meselaya wayironê heqi kerd safi, ına saye dı sareyê ma berzo. Ma pê projeyê xu hem mehlaya Afaton keni newe u wayironê heqi tengasi ra xelısneni u hem zi ma bajarê xu keni newe, cayonê neweyon vırazeni.”

 

"Şıkır, ma wadê xu yê tor muhim ê vicnayiş oni ca"

 

Reis Arıkan va; “Vicinayişê 2019 dı wedonê ma yê tor muhimon ra yo projeyê bajari newekerdış bı. Ma ın proje erzeni fealiyet, ınay ra sareyê ma berzo. Şıkır, tarixê ihaleyê ma kıfş bı, Homa biyaro weri ma lezabez proje erzeni fealiyet. Ez semedê destegê yin Reisêcumhurê Muhterem Receb Tayyip Erdoğan ri, Wezirê Dormale u Bajari Murat Kurum ri, Paştmirê Reisê ma Dr. Cevdet Yılmaz ri, Wekilê ma Feyzi Berdibek ri, Waliyê ma Kadir Ekinci ri, Sereyê TOKİ Ömer Bulut ri, burokratonê ma yê qıymetziyedon ri, wayiri heqi ki tım pê baweri u sabır paşt da ma yin ri, ekiba Mudırtiya İmar u Bajari ri, duesti ma yi ki zerr ra ma het bi yin ri u ê ki proje dı keda yin esta, yin hemın ri zaf teşekur keno. Ma pê quwetê dewleta xu u sabır u destegê wayironê heqi projeyê xu viyarneni fealiyet; ma bajarê ma meselaya bajari newekerdış ra xelısneni u wayironê heqi zi resneni heqê yin. Wa bajarê ma ri u wayironê heq ri bımbarek bo u bıxeyr bo.”

Anket

Yeni sitemizi beğendiniz mi ?

Evet
Hayır
Normal