FITAR DİYENA XEBATKARONÊ SIHET

Belediyaya Çoligi, her ruej fıtar dona 175 xebatkaronê sıheti ki riyê tedbironê virusê korona ra nêeşkeni şiyeri keyeyê xu.

Tıxtor, hemşire u xebatkari bini sıheti ki Nêweşxoneyê Dewlet u Nêweşxoneyê Cini, Welıdiyayiş u Qıcon ê Çolig dı xebıtiyeni u riyê tedbironê virusê korona ra nêeşkeni şiyeri keyeyê xu Belediyaya Çoligi aşma Remezani dı zi ha yin het dı ya.

Ekibi belediya verco Merkezê Cıwani ê Veysel Belgin dı wer keni paketon u dıma zi tesisi ki xebatkari sıheti tede moneni paketonê weri beni ê tesison. 

175 xebatkari sıheti her ruej fıtar u paşiv pê werê Belediya keni. Reisê Belediya Erdal Arıkan iştıraqê organizasyonê wervılakerdışi kerd. Arıkan beyanat da qezetewonon u va, xebatkari sıheti heyatê xu ra viyereni u qehremaniya pil keni; yin ri xızmetkerdış semedê ma ğururêko pil o.

Xebatkaronê sıhet belediya rê teşekur kerd

Xebatkari sıheti ki fıtar ra ver yeni werê xu geni miyonê ına tengasi dı ın izet u ikramê Belediya ra memnuni.

Xebatkaronê sıheti ra Toxtor Lütfü İhsan Servisa Acil ê Nêweşxoneyê Dewlet ê Çolig dı xebıtiyeno. Toxtor Lütfü İhsan riyê virus ra nieşkeno şiyero keyeyê xu  u mısafırxoneyê melımon dı moneno.

İhsan, Belediya rê teşekur kerd u va: “Ma semedê huzurê ewladonê muhteremonê ın welatê ezizi şew u ruej xebıtiyeni. Dewleta ma, ma mısafırxoneyê melımon dı kena meyman. Wa dewleta ma daim bu. Belediyaya ma zi aşma Remezani dı semedê fıtar desteg dona ma. Ez Belediyaya ma rê u şarê Çoligi hemın rê teşekur keno.”

Xebatkarê sıheti Murat Esen zi va, Belediyaya Çoligi ma teyna nêverdayi: “Ma vera virusê korona herb keni. Ini ruejon dı Belediyaya Çoligi fıtar dona ma. Ma Belediyaya ma rê zaf teşekur keni. Yin ma ıni ruejon dı teyna nêverdayi, ın semed ra ma zaf teşekur keni.”

Anket

Yeni sitemizi beğendiniz mi ?

Evet
Hayır
Normal