ÇOLİG DI SEFERBERİYA VİRUSÊ KORONA

Belediyaya Çoligi çarçiwaya tedbironê virusê korona dı, şew u ruej semedê dezenfekte u sterilizasyon xebıtiyena. Cayi ki hemwelati zaf şıxulneni yeni pakkerdış.

Reisê Belediyaya Çoligi Erdal Arıkan, derheqê xebatonê verniya virusê korona guretış dı beyanat da.

Reis Arıkan, çarçiwaya tedbiron dı xebata xu rê dewomkerdışê ekibonê Mudırtiya Veteriner ser vındert u va, cayi ki hemwelati zaf şıxulneni verco ê cayi yeni pakkerdış. 

Reis Arıkan hına va; “Wesayiti xeti, camiyi, texsiyi ticari, binayi teşkilatonê kamu u cayi ki şar zaf şıxulneno dezenfekte biyi. Xebata dezenfeksiyon dı semedê sıhet u huzurê şarıstonê xu cayi ki şar zaf şıxulneno ma gıroni doni ıni cayon ser. Ekibi ma yi mutehasısi dezenfeksiyon u sterilizasyon ser xebıtiyeni; ekibi Mudırtiya Paki zi cehde u kuçeyon keni pak. Heto bin ra ekibi Mudırtiya BİSKİ zi depoyonê awa weri keni pak u klor keni.”

Reis Arıkan va; “Xebati dezenfekte her ruej çarçiwaya plan dı dewom keni. Heta risk wedariyo her ruej ıni xebati yeni kerdış. Vındertışê şıli ra pey heme parki, baxçeyi u cayi kaya qıjon reyna dezenfekte beni.”

Teftişi zidyayi

Cayi ki çarçiwaya talimatê Wezaretê Gureyê Zerre dı fealiyetê yin omeyo vındarnayiş, Reis Arıkan vera yin zidyayişê teftişi ser vındert u hına qısey kerd; “Ekibi zabıtayê ma zê qehwexone, qıraatxone, kafeterya u saloni kayon cayi ki fealiyetê yin çarçiwaya tedbironê vera virusê korona omeyi qefılnayiş teftişonê xu rê dewom keni. Ekibi ma yi ki pê koordinasyon xebıtiyeni teftişê seha het dı guerê ixbaronê hemwelatiyonê ma zi edreson teftiş keni. Heto bin ra marketon dı teftişê fiyet zidnayiş u fırınon u cayonê binonê imalat dı zi teftişê hijyen dewom keno.”

 “Ma heme piya tabiyê qeydeyon bı”

Reis Arıkan va, lazım o ma heme tabiyê heme tedbironê wezareton bı u hına qısey kerd; “Lazım o her hemwelatiyê ma tabiyê heme tedbironê Wezaretê Sıhet u Wezaretê Gureyê Zerre bo. Gereka ma semedê sıhetê xu u hesgeronê xu pawıtış, tedbiri ki Wezaretê Sıheti kerdi eşkera yin yo bı yo biyari ca u heta ma mecbur nêmoni ma keyeyê xu ra meveci teber. Dewlet u welatê ma yi ki her tengasi ra rısıpi xelısiyayi ın hal ra zi rısıpi veciyeni. Gereka ma tedbirê xu bıgêr u tabiyê qeraron u tedbiron bi.”

Anket

Yeni sitemizi beğendiniz mi ?

Evet
Hayır
Normal