BI HEZARON TEN OMI PİSER

Bı hezaron Çoligıc ‘15 Temuz Ruecê Yoyiya Milli u Demokrasi’ dı beyraqi Tırkiya kerdi xu desta u nobeta demokrasi dı ome tihet.

Teşebusê darbeyo ki pê destê organizasyonê teror FETO 15 Temuz 2016 dı vıraziya bı u pê xuveradayişê şari ın teşebus serabın bıbı, zê heme cayê Tırkiya Çolig dı zi Serrgêra 3yın ê ın teşebus dı ciya ciya programi vıraziyayi.

 

Verco pê iştıraqê Wali Kadir Ekinci, Reisê Belediya Erdal Arıkan mensubonê binon ê protokol u hemwelatiyon, mezeli şehidon ziyaret biyi u qeranfili niyayi mezelon ser. Dıma Comiya Pil dı semedê şehidon molud omı wendış. Molud ra pey awa gul diya hemwelatiyon qıc ra pil herkesi qey şehidon dua kerd.

 

Saetonê şond dı hemwelatiyi verê Qonağê Hukumat dı omê piser; beyraqi Tırkiya u pankarti şehidonê 15 Temuzi kerdi xu desta u heta Cehdeyê Genç Meydonê 15 Temuz rayir dı şiyi.

 

Wali Kadir Ekinci, Reisê Belediya Erdal Arıkan, Wekilê Sereskerê Tugaya Komandoya 49ın Miralay Ali Olcay Küçüktepe, Sersawciyê Cumhuriyet Fatih Çoban, Rektorê Universiteya Çoligi Prof. Dr. İbrahim Çapak, Sereyê Şarıstonê Çoligi ê AK Parti Mehmet Hanefi Güler, amiri teşkilaton u temsilkaronê teşkilatonê sıvilon iştıraqê programi kerd.

 

Wali Ekinci: “15 Temuz hem şewa keder a hem zi şewa serfırazi ya”

Programo ki pê wendışê Quranê Kerimi dest pêkerd Wali Ekinci tede qısey kerd u va; “Şewa 15 Temuz dı derheqê 15 Temuzi dı qısey kerdış, derheqê darbeyon dı fıkırê xu vatış nimetêko pil o. Sare dı 15 Temuz derheqê darbeyon, zuarbaşi, zulımon dı qısey kerdış, ın çiyon bı reheti vatış yo nimet o. Homayi ri şıkır ki ma ri kerd qısmet ma Çoligıci ki seraserê tarix dı vera zulım mılê xu çot nikerdo, tımotım rueşnayi dıma gêrayi, tımotım mezlumi het dı vınderti u pê vındertışê xu nomeyê cesur heta peyni keno heq, ma eşkayi yin dır sohbet kerd. Şıma zi zoni 15 Temuz hem yo şewa keder a hem zi yo şewa serfırazi ya. Yo kışt dı şehidi ma yi ezizi ki semedê welat, mıllet u beyraq xu kerd siper kışta bin dı zi şarê ma yo ki pê şuurê tarix vınderto o esto.”

 

Reis Arıkan: “Şehid u gaziyon a şew tarix nuşt”

Reisê Belediya Erdal Arıkan şewa 15 Temuz dı tarix nuştışê şehidon u gaziyon ra behs kerd u va; “Şehid u gaziyonê ma, a şew pê cesarete xu tarix nuşt. Zê hezar serr veri Malazgirt, se serr veri Çanakkale, Herbê Xelas yona dor muet ra ki tiya welatê ma yo. Xayini welati ki vatini qey idareyê dewlet erzeni xu dest, Tırkiya keni leteyi sıbayerco ruecperayiş ra ver tarumar biyi. In teşebusê darbe teyna veradewlet nê vera şar zi bı. Pê ın teşebus waziya çiyi ki ma pê yin esti, yin ma dest ra bıgêri, heq u xuseriya m ama dest ra bıgêri; labelê şarê ma destur nida ınay.”

 

Temsilê Şehid Ömer Halisdemir omı ramuetış

Teşkilatê Cıwani ê AK Parti yo temsilo sembolê 15 Temuz Şehid Ömer Halisdemir muet ra. Program dı ilahi woniyayi, Qorano Kerim woniya dıma Mıftiyê Çoligi Muharrem Genç dua kerd. Program pê heme comiyon dı woniyayişê sala qediya.

Anket

Yeni sitemizi beğendiniz mi ?

Evet
Hayır
Normal