BELEDİYAYA ÇOLİGİ CİRONÊ XU HET DA

Şarıstono ciron Xarpêt dı piliya 6.8 dı erdlerz ome meydon. Belediyaya Çoligi erdlerz ra pey bi seferber u pê destegê hemwelatiyonê Çoligıjon destego pil da mıntıqayê erdlerzi. 

Reisê Belediyaya Çoligi Erdal Arıkan, erdlerzê Xarpêt ra pey cad semedê şarıstonê cironi xebat da destpêkerdış.

Pê 20 teni ekiba gêrayiş u xelısnayişi niya ru

Pê talimatê Reis Arıkan, Mudırtiya İtfaiye dı pê 20 teni ekiba gêrayiş u xelısnayişi niya ru. Ekib, mudeyêko kılm dı xu kerd hazır Xarpêt dı dest bı gêrayiş u xelısnayiş kerd.

Ekiba Belediyaya Çoligi, ekiba AFAD dır pê koordinasyon xebıtiya u semedê bırindaron bınê xırbeyon ra xelısnayiş zaf cehıd kerd.

Çolig bı seferber

Rayberiya Belediyaya Çoligi dı pê destegê Wadeyê Tucaret u Senayi  ê Çoligi (Bingöl TSO) u Cemiyetê Qezetewononê Çoligi kampanyaya destegi vıraziya.

Kampanyaya ki pê sloganê ‘erdlerzi tor hol tı zoni’ vıraziya semedê desteg dayiş veng dıya hemwelatiyon.

Hemwelatiyonê xeyrwazon betani, liyefi, sobayi, kınci zımıstoni u çiyi weri berdi Merkezê Cıwoni ê Veysel Belgin u Çatrayirê Quleya Seet u teslimê mesulonê kampanya kerdi. Yardımi ki seraserê 2 ruejon dı onciyayi piser semedê meğduronê erdlerzi teslimê ekiba AFAD ê Xarpêti biyi.

Qey meğduronê erdlerzi şuarbaya germın 

Ekiba ki bınê mayetê Mudırtiya Kultur u Gureyonê Sosyal dı niya ru resa cayê afat, dêstır tedbirê xu di u leyeyi şuarba nayi ru. 

Şuarbaya germın ruej dı dıya 7 hezar meğdurê erdlerzi u ekibonê gêrayiş u xelısnayişi.

Arıkan, “Dejê yin dejê ma wo”

Reisê Belediya Erdal Arıkan erdlerz ra pey heme imkonon seferberkerdış ser vındert u va, “Erdlerzo ki Xarpêt u Malatya dı ome meydon hemeyê welatê ma u şarê ma zaf dejna. Erdlerz ra pey tafli dı dewleta ma pê heme teşkilatonê xu, xu da Xarpêti ser. Belediyayi ma, teşkilati sıvıli u şarê ma zi heme bi yo u semedê Xarpêt ri desteg kampanyayi vıraşti. Erdlerz çıta yo, tor hol ma zoni. Ma bı hemwelatiyonê xu u bı teşkilatonê xu heme piya semedê Xarpêti biyi yo. Semedê destegi hemwelatiyonê ma dest ra çı omi yin kerd. Ma zi ıno bınate dı biyi wesile. Ez semedê qedırzonayiş u xeyrwaziya yin heme hemşehriyonê ma ri zaf zaf teşekur kena. Dewleta ma u mıleta ma semedê hemşehriyonê ma yê Xarpêti çı luzum bıkero keni u derdê ê way u bırayonê ma lezabez dermon beno. Hemwelatiyi ma yi ki erdlerz dı wefat kerdo Homa rehma xu yin kero u Homa şifa bıdo bırindaronê ma.”

Anket

Yeni sitemizi beğendiniz mi ?

Evet
Hayır
Normal