BARAKAZİ, SEBEBÊ XU EŞKERA KERD

Barakazi, derheqê kombiyayişê medyayo ki pê iştıraqê Paştmirê Reisê Umumi Yılmaz u Wekil Berdibek vıraziya bı, ıno kombiyayiş ri iştıraq nikerdış u mewzuyonê medyaya mehalli dı qısey kerd  u va: “Seretiya bajar, nuşteyê melumato ki dabı qezetewonon, ıno nuşte dı ca nomeyê mı nida bı; bı ıno qeyde şexsê mı ri u meqamo ki iradeyê şari yo, yi ri bêhurmeti kerda. Mı zi ıno sebeb ra iştıraq nikerd.”

Reisê Belediyaya Çoligi Yücel Barakazi, kombiyayişê medyayo ki pê iştıraqê Paştmirê Reisê AK Parti Cevdet Yılmaz, Wekil Feyzi Berdibek, Sereyê Bajar Hanefi Güler, Namzetê Reisê Belediyaya Çoligi Erdal Arıkan u Sereya Qısımê Ciniyon Tuğba Varolgüneş vıraziya bı derheqê ıno kombiyayiş dı ca nigırotışê xu dı beyanat da.

Barakazi, programo ki ruecê verê kombiyayişi vıraziya bı ıno program ri iştıraqkerdışê xu ra behs kerd u hına qısey kerd: “Ez raşteyê teyara dı şiya Paştmirê Reisê ma Cevdet Yılmaz u heyetê yı vera u programi ki o ruec biyi mı iştıraqê ê programon kerd. Bêhurmetiyi ki vera meqamon bıbi ez çarçiwaya terbiyaya dewlet dı yin etik nivineno. Ina çarçiwa dı mı binaya partiya ma dı kombiyayişê teşkilatê cıwonon ri iştıraq kerd. Mı ınay ra pey zi kombiyayişê azayonê meclisê bajar u kombiyayişê azayonê meclisê belediya ri zi iştıraq kerdên; labelê ıni her dı kombiyayişi iptal biyi. Paştmirê Reisê Partiya ma Cevdet Yılmaz u Wekilê ma Feyzi Berdibek şar dır yo bı yo mışorı kerdên; ınay ra ez binaya parti ra şiya. Kombiyayişê medyayo ki ruec Bazar beno zi ez pê melumatê Mudırê Qelema Xısusi pê hesiyayo.”

 “Ez ıni tigêrayişon hol nivinena”

Barakazi hına dewom kerd, “Nuşteyê deweto ki hetê Seretiya Bajar ra erşawiyayo medya, mı ri bêhurmeti yona dor muecneno ra. Yo gruba ki heme qezetewoni tede ca geni ınay ser ra vaciyeno ki pê iştıraqê Paştmirê Reisê ma Cevdet Yılmaz, Wekilê ma Feyzi Berdibek, Sereyê Bajarê ma Hanefi Güler u Namzetê ma Erdal Arıkan kombiyayişê medya vıraziyeno. Ez dewetê kombiyayiş biya; labelê nomeyê mı liste dı çin o u ınay ser ra zi muhterem Yılmaz u muhterem Berdibek vengê xu nikeni. Seretiya bajar verco zi gureyi hınayini kerdi u şexsê mı ser ra meqomê Reistiya Belediyayo ki şari temsil keno ê meqom ri bêhurmeti kerda. Siyasetmedaronê ma ê weziyeton dı zi vengê xu nikerd. Ez zi ıno tigêrayiş ser ra nişiya kombiyayişê medya.”

 “ Mı sebeb Muhterem Berdibek ra niva”

Kombiyayişê medya dı yo qezetewoni vat bı “Yücel Beg çı ra kombiyayiş dı niyo? Eceb dewet nibiyo?” ınay ser ra Wekil Berdibek zi vat bı “Barakazi vato “ beno ki şıma xısusi qısey bıkeri, iştıraqê mı raşt nibeno, mı ğelet fom mekerên.” Reis Barakazi derheqê ıni vateyon dı zi hına qısey kerd, “Mı derheqê kombiyayişê medya dı wekilê ma dır mışorı nikerd. Mı derheqê iştıraqkerdış u nikerdış dı zi cı ra yo sebeb niva. Qıseyi ki kombiyayiş dı vati yo hukmê yin çin o.”

Anket

Yeni sitemizi beğendiniz mi ?

Evet
Hayır
Normal