5 RUEJON DI 650 KAMYON VOR KIRIŞİYA

Reisê Belediyaya Çoligi Yücel Barakazi va, çarçiwaya vor pakkerdış dı 5 ruejon dı 650 kamyon vor kırışiya teberê bajari.

Reisê Belediyaya Çoligi Yücel Barakazi, merkeze çarşu u mehlayon dı xebata vor pakkerdış tetkik kerd.

Barakazi amıronê ekibon ra derheqê xebat dı melumat guret, esnaf u hemwelatiyon dır sohbet kerd u semedê desteg u hesasiyetê yin teşekur kerd.

Barakazi, derheqê xebaton dı melumat da qezetewonon u va, vera serd u heme tengasiyon xebati dewom keni.

Barakazi, bajar dı pê 5 greyderon, 10 wesayitonê bar, 6 kamyonon, 3 wesayitonê sualkerdış, 2 wesayitonê pêyarayir pakkerdış u 170 personel dewombiyayişê xebaton ra behs kerd u hına qısey kerd: “Sare dı merkeze çarşu heme mehlayonê ma dı xebati ma dewom keni. Cayo ki trafik tede zaf o u hemwelati zaf şıxulneni gıroniya xebat dıyaya ê cayon. Xebatonê merkezê çarşu dı zerreyê 5 ruejon dı 650 kamyon vor bajar ra omi eştış. Ma semedê rayirê wesayiton u pêyarayiron vor ra pakkerdış u tigêrayişê wesayiton u pêyayon rehetkerdış şew u ruej xebıtiyeni.”

 “Ino zımıston, zımıstono ğıdar ê serronê pêyinon o”

Barakazi hına va: “Merkezê bajar dı qalıniya vor biya nızdiya yo metre. Kuyeston u cayonê berzon dı 2 metreyon viyerta. Riyê vor ra teyna merkezê bajar dı nê rayironê dewon u rayironê bınateyê bajaron dı zi tengasi vıraziyena. Ekibi Belediyaya ma pê usulê 24 saet xebıtiyeni. Ma hetêk ra rayir u pêyarayiron keni pak heto bin ra zi sual keni. Ekibi Mudırtiya İtfaiyeya ma zi cayi ki pêyayi zaf şıxulneni ê cayon dı cemede çatuyon keni pak.”

 “Wa wayiri wesayiton pê hesasiyet tibıgêri”

Barakazi, riyê wesayitonê parkerdeyon ra xebaton dı tengasi ra behs kerd u hına va: “Ekibi ma xebata xu, riyê rayiron ser parkbiyayişê wesayiton ra zaf tengasi onceni. Ekibi Mudırtiya Zabıtaya ma, cayi ki tede xebata vor pakkerdış bena ê cayon dı reseni wayironê wesayitonê parkkerdeyon u emniyetê trafik tesis keni. Ina çarçiwa dı lazımo wayiri wesayiton bınêna pê hesasiyet tibıgêri. Heto bin ra esnaf u hemwelatiyi ma yi ki wextê xebaton dı ma ri beni desteg ez yin ri teşekur keno. Ekibi ma yi semedê vor pakkerdış şew u ruej xebıtiyeni, ez zerr ra yin ri zi teşekur kena.”

Arızayê Metan temir bı

Barakazi, arızayo ki çımeyê awa weri ê Metan dı varayişê vor ra pey omı bı meydon, yi ra zi behs kerd u va: “Riyê hezaz ra xetê awa weri ê Metan dı arıza vıraziya. 3 wesayiton u 8 personelon semedê cayê arıza resayiş bı ruejon mucadele kerd. Mıntıqa dı qalıniya vor 2 metreyon viyerta, ca ca mıj bı bı u tehlikeye cemedi bı bı; ınay ra mıntıqa resayiş, ruejon ra pê ancax bı mumkun. Ekibi xebatêka gıron ra pey resayi cayê arıza u arıza temir kerd. Ekibi BİSKİ, DSİ, idareyo xısusi ê bajari ki ni va şew ni va ruej cehd kerd u Waliyê ma Kadir Ekinci wo ki teşkilati ma sewq kerdi u paşt da ma, ez yin hemın ri teşekur keno.”

Anket

Yeni sitemizi beğendiniz mi ?

Evet
Hayır
Normal